Општина Прилеп продолжува со реализација на проектот за „Реконструкција на главен довод од Пашоски ливади до собирна шахта за град Прилеп”. Директорот на ЈКП ,,Водовод и Канализација” – Прилеп, Игор Гулабоски заедно со градоначалникот на Општина Прилеп Борче Јовчески денес ја посети локацијата и изврши увид во градежните активности околу реализација на проектот.
Постојниот цевковод е изграден во 50-тите години од минатиот век и поради неговата дотраеност е намалено снабдувањето со вода од каптажата „Пашоски ливади“ до градот. Реконструкцијата на доводниот цевковод од каптажата викана „Пашоски ливади“ до собирната шахта е во вкупна должина од 3.850 метри. Со овој реконструктивен зафат, стариот цевковод ќе се замени со нови дуктилни цевки со дијаметар ф-300 од светски познатиот произведувач ,, Понтамусон “, со што ќе се овозможи зголемен проток на вода од 25л/сек. Предвидено е реконструкцијата на цевководовот да се одвива во две фази, од кои во првата би се реконструирале 3.045 метри.
Реализацијата на овој проект значително ќе придонесе во решавање на долгогодишните проблеми и ќе обезбеди континуирана екплоатација на вода до крајните корисници во текот на целата година . Со тоа ќе се надминат проблемите со водоснабдувањето на локалното население.
Средствата за имплементација на овој проект се обезбедени од ТАВ програмата.
